"Rain Rain Rain"

"Barish Allah ki rehmat, ya sheriyon k liye zehmat"
lafz barish k zehan mai atay hi tazgi ka ehsaas hota hai, barish buzurgon, bachon aur nojawano ko yaksaan toor per pasand hoti hai, koi shaks bhi asa nahi hoga jisay barish pasand na ho, chahay barish bohat ziyada barsay ya bohat kam, logon ki nazar main barish ki pasand ka graf hamesha aik sa hi rehta hai.
Ager hum apny shehr karachi ki baat kerain tou barish k kuch manfi asraat bhi nazar atay hai, lekin is mai barish ka koi amal dakhl nahi, yeh tu hamari intizamiya ka kasoor hai k Alla hukaam nay kabhi bhi barish k drainage system per koi khasosi tawaja nahi di, aur karachi k sheriyon k liye barish rehmat k saath saath akser zehmat bhi ban jati hai.
Karachi shehr ki ziyada tar tameraat baghair kisi planning k hui hai, jin mai drainage system ka bhi koi intizaam nahi rakha gaya, is liye jab kabhi mamool say ziyada barish hojati hai tou pani gharoon aur kabhi kabhi flats tak bhi pohanch jata hai, siwaye kuch areas k ziyada tar areas ka yahi haal hai.
Shehri barish ko enjoy kerny k bajaye apny gheron mai say pani nikalty nazar ata hain, hamaray sheher ka sewerage system bhi koi qabil-e-zikar nahi hai, chand aik hi areas hain jahan sewerage ka nizaam phir bhi behter hai warna jis tarhan yeh nizaam chal raha hai is ka Allah hi malik hai, is liye jab bhi barish mamool say ziyada hoti hai tou yeh bilkul hi talpat hojata hai, water and sewerage lines block hojati hain, yahan tak jab bhi barish k asaar nazar atay hain tou city mai emergency nafiz hojati hai, jaisay khuda na khasta koi bohat buri aftaad per gai ho, traffic jam hojata hai, aur loogon k liye apny gheron ko pohnchan mushkil hojata hai, is liye amoman yahi kaha jata hai Karachi sheher k liye barish rehmat kam aur zehmat ziyada banti hai.
Jahan per Karachi mai barish honay say tabahi ajati hai wahan per is kuch musbit pehlo bhi samny atay hain jaisay fiza saaf suthri hojati hai, aur dams bher jatay hain jis ki waja say pani ki qilaat door hoti hai, phool podon mai nai jaan ajati hai aur mahol khushgawaar hojata hai.
Tou baat yeh samny ai k barish hona tou rehmat hi hai lekin humari apni hi kotahiyon ki waja say barish hamaray liye zehmat bati ja rahi hai, hamary government ko chahiye k is taraf bhi dheyan dy aur agli barish honay say pehly in khamiyon ko door kiya jaye.